Fimmtudaginn 26. september s.l. var íslensk þýðing og staðfærsla á heimasíðu með kennsluefni fyrir foreldra barna með einhverfu
opnuð í Gerðubergi.
Einhverfa er ekki lengur sjaldgæft fyrirbæri. Algengi einhverfu hefur vaxið hröðum skrefum undanfarinn áratug og nýjustu fréttir af þeim
vettvangi hjá íslenskum börnum er 1,2% sem svarar til þess að um það bil 55 börn bætast við árlega.
Mikilvægt er að íhlutun hefjist sem fyrst eftir að grunur um einhverfu hjá barni vaknar. Þar sem ekki er alltaf hægt að mæta umsvifalaust
þörf fyrir þjónustu getur liðið dýrmætur tími þar til foreldrar fá ráðgjöf um hvernig best sé að vinna
með barninu þeirra. Á internetinu stendur foreldrum til boða fjöldi meðferðarleiða sem margar lofa góðum árangri. Niðurstöður
rannsókna hafa ítrekað bent til þess að mikilvægt sé að styðjast við gangreyndar aðferðir í íhlutun barna með einhverfu.
Atferlisgreining (Hagnýt atferlisgreining, ABA) er grunnurinn að árangursríkustu íhlutunarleiðunum fyrir börn með einhverfu.
Til að koma til móts við þörf foreldra á góðri fræðslu um snemmtæka atferlisíhlutun, fékkst styrkur úr Leonardo
menntaáætlun Evrópusambandsins, til þess að þróa frekar, þýða og staðfæra kennsluefni fyrir foreldra. Kennsluefnið var
upphaflega þróað á Norður-Írlandi og nefnist Skref fyrir skref, eða Simple Steps á frummálinu (www.simplestepsautism.com).
Styrkveitingin gerði það mögulegt að koma efninu yfir á sænsku, ítölsku, hollensku og íslensku, svo og að staðfæra og
þróa nýtt efni í samstarfi við sérfræðinga á Norður-Írlandi og Bretlandi. Leonardo hafði áður veitt styrk við
að þýða efnið á norsku, þýsku og spænsku. Það verður einnig innan skamms fáanlegt á portúgölsku.
Kennsluefnið samanstendur af myndskeiðum, lesefni, viðtölum, sýnikennslu og útskýringamyndum, þar sem farið er yfir þann grunn í
hagnýtri atferlisgreiningu sem nauðsynlegt er að hafa í upphafi íhlutunar.
Markmið efnisins er að veita foreldrum, kennurum og stuðningsaðilum barna með einhverfu haldgóðar upplýsingar um gagnreyndar aðferðir til þess
að virkja námsgetu barna með einhverfu til fulls. Efnið þykir einstaklega foreldravænt, en það var upphaflega þróað í samstarfi
við foreldra barna með einhverfu. Efnið nýtist einnig í íhlutun með börnum sem eru með önnur frávik í þroska. Með
því að gera foreldrum kleift að styðja sem best við þroska barna sinna, auðveldar það börnunum að nýta sér það
sem þau læra í leik- og grunnskólanum. Auk þess gerir sú þekking sem foreldrar öðlast þeim kleift að nýta sér betur
þá ráðgjöf sem alltaf þarf að vera til staðar frá ráðgjöfum sem hlotið hafa alþjóðlega viðurkennda
þjálfun.
Frekari upplýsingar má nálgast á heimasíðunni www.simplestepsautism.com og hjá
Sigríði Lóu Jónsdóttur, sálfræðingi á Greiningar- og ráðgjafarstöðinni, sem er verkefnisstjóri Skref fyrir skref
hér á landi (sigridurloa@greining.is).
Myndir má skoða hér Skref fyrir skref