Sjálfsbjörg, landssamband hreyfihamlaðs fólks hefur gefið út bæklinginn Fæði, þyngd og heilsa hreyfihamlaðs fólks en sambandið fékk leyfi sænsku samtakanna Spinalis Foundation (Samtök mænuskaddaðra) til að þýða bæklinginn.
Í stað þess að einskorða innihald bæklingsins við mænuskaddaða þá er honum beint til fleiri hópa hreyfihamlaða. Fólk með heila- og mænusigg, heilalömun og aðrar fatlanir getur einnig notið góðs af ábendingum og ráðum sem þar má finna. Tilgangurinn með útgáfu bæklingsins er að fræða fólk um hættuna á að þyngjast of mikið þannig að offita verði síður vandamál, hvernig koma má í veg fyrir þyngdaraukningu og almennt um mikilvægi mataræðis fyrir góða heilsu og vellíðan.
Undirstaða góðrar heilsu og vellíðunar er hollur matur. Staðreyndin er sú að óheilsusamlegar matarvenjur eru efst á lista yfir áhættuþætti sem valda algengustu lífsstílssjúkdómunum í heiminum: hjarta- og æðasjúkdómum, sykursýki tvö og nokkrum tegundum krabbameins.
Bæklingurinn leitast við að svara hvers konar mataræði er heppilegast að tileinka sér og hvernig sé best að reyna að léttast og koma í veg fyrir að aukakíló hrannist upp.