Dagskrá vorráðstefnu Ráðgjafar- og greiningarstöðvar komin í loftið!

Hin árlega vorráðstefna Ráðgjafar- og greiningarstöðvar, verður haldin 2. og 3. maí 2024 á Hilton Reykjavík Nordica og í streymi.

Yfirskrift ráðstefnunnar að þessu sinni er: Kynheilbrigði og fjölbreyttur taugaþroski - Mætum ólíkum þörfum frá bernsku til fullorðinsára.

Hér má sjá dagskrá ráðstefnunnar sem er bæði innihaldsrík og fjölbreytt! Efnistök eiga erindi við alla sem lifa og starfa með börnum, ungmennum og fullorðnum með öðruvísi taugaþroska - allt frá leikskólaárum til fullorðinsára.

Snemmskráning er til og með 9. apríl - Skráðu þig núna með því að smella hér!

• Kaffiveitingar í hléum sem og hádegisverðarhlaðborð á fimmtudeginum er innifalið í ráðstefnugjaldi.

• Ráðstefnugestir frá 20% afslátt af gistingu á Hilton Reykjavík Nordica. Frekari upplýsingar eru í upplýsingapósti við skráningu á ráðstefnuna.

Ákall hefur verið eftir aukinni kynfræðslu fyrir börn og ungmenni sem mikilvægt er að bregðast við. Hvað með börn og ungmenni með fjölbreyttan taugaþroska? Hvernig þarf að huga að kynfræðslu fyrir þann hóp og hvers vegna er mikilvægt að aðlaga kennsluhætti og fræðsluefni til að mæta mismunandi þörfum? Þessum spurningum ásamt fjölmörgum öðrum verður svarað á ráðstefnunni.

Markmið ráðstefnunnar er að vekja athygli á mikilvægi þess að huga að ólíkum þörfum hvað kynheilbrigði varðar til að mæta betur börnum með fjölbreyttan taugaþroska, allt frá fyrstu aldursárum yfir á fullorðinsaldur. Á ráðstefnunni verður umfjöllun um almenn hagnýt ráð tengd kynfræðslu til að stuðla að kynheilbrigði barna og ungmenna og þær áskoranir sem foreldrar og fagfólk standa frammi fyrir varðandi kennsluhætti um kynheilbrigði.

Á ráðstefnunni verður einnig fjallað um áskoranir ungmenna með fjölbreyttan taugaþroska á netinu, fræðsla verður um læknisfræðileg inngrip sem hafa áhrif á kynþroska, erindi verður um hinsegin og skynsegin börn og ungmenni, umfjöllun verður um stuðning og þarfir fyrir heilbrigt kynlíf og rætt verður um áskoranir og tækifæri skólahjúkrunarfræðinga þegar kemur að kynfræðslu.

Kynning verður á nýju námsefni um kynfræðslu fyrir öll skólastig og fjölbreyttar þarfir auk þess sem rætt verður um hvernig hægt er að greina á milli viðeigandi og óviðeigandi kynhegðunar út frá aldri og þroska barna og hvernig hægt er að bregðast við óviðeigandi kynhegðun barna og ungmenna strax á leikskólaaldri og fram á fullorðinsár.

Reynsla og upplifun fullorðinna og barna með ólíkar þarfir mun endurspeglast í erindum sem og umfjöllun um hvernig hægt sé að huga að, mæta og styðja við börn og ungmenni í leik-, grunn- og framhaldsskóla.

Ætlunin er að ráðstefnan hafi hagnýtt gildi og verði liður í því að staðið sé betur að kynfræðslu fyrir börn og ungmenni með fjölbreytan taugaþroska sem og gefi þeim sem starfa með fullorðnu fólki innblástur hvernig megi styðja betur við kynverund fullorðins fatlaðs fólks sem hefur fram til þessa fengið takmarkaða kynfræðslu.

Aukum mikilvæga þekkingu um kynheilbrigði og fjölbreyttan taugaþroska!