Vorráðstefna 2021

Vorráðstefna Greiningar- og ráðgjafarstöðvar 2021:

Börn með fatlanir - Viðhorf og valdefling

Árleg vorráðstefna Greiningar- og ráðgjafarstöðvar (GRR) verður haldin 29. og 30. apríl 2021. Að þessu sinni stendur ráðstefnan í einn og hálfan dag, henni lýkur á hádegi föstudaginn 30. apríl.

Á ráðstefnunni verða viðhorf og valdefling fatlaðra barna í brennidepli. Kynnt verður verkefni sem unnið var á vegum Embættis umboðsmanns barna sem kallast Raddir fatlaðra barna. Eiður Welding fötlunarfræðari segir frá sinni reynslu, fulltrúar úr Ungmennaráði Þroskahjálpar kynna sín áherslumál og Atli Lýðsson mun segja frá fjölskyldubúðum sem haldnar voru í Vík í Mýrdal síðastliðið sumar.

Fjallað verður um fjölbreyttar birtingarmyndir þroskahömlunar og hvernig framfarir í erfðafræði geta nýst við ráðgjöf og meðferð þroskaraskana. Sjaldgæfir fötlunarhópar fá rými í dagskránni m.a. verður sagt frá þjónustu fyrir blind og sjónskert börn og kynntar niðurstöður tilviksrannsóknar um lífsgæði heyrnarlausra barna og unglinga. Til umfjöllunar verður kynheilbrigði og kynfræðsla, leiðir fyrir fötluð ungmenni til samskipta gegnum tölvu- og hlutverkaleiki og kynntar nýjungar í upplýsingatækni við stuðnings- og sérkennslu.

Eins og undanfarin ár verða málefni innflytjenda til umfjöllunar og sagt frá rannsókn á börnum af erlendum uppruna sem hafa fengið þjónustu á Greiningar- og ráðgjafarstöð. Rannsóknir um snemmtæka íhlutun barna á leikskólaaldri og skimun fyrir einhverfu í ung- og smábarnavernd verða kynntar, sagt frá hugmyndum að nýju vinnulagi í samstarfi GRR og sveitarfélaga og hvaða tækifæri felast í lögum um samþættingu þjónustu í þágu farsældar barna.

Þótt stutt sé síðan seinasta „Vorráðstefna“ var haldin eða í september síðastliðnum vonum við að fagfólk og foreldrar sjái sér fært að taka þátt nú í apríl. Ráðstefnan verður að öllum líkindum bæði haldin í sal á Hilton Nordica hótelinu, þannig að tækifæri gefst til spjalls og skoðanaskipta, en dagskránni verður einnig streymt.

Staðsetning: Hilton Reykjavík Nordica