STYRKTARSJÓÐUR TIL MINNINGAR UM ÞORSTEIN HELGA ÁSGEIRSSON STYRKIR STARFSMENN

Í dag 8. júní voru veittir styrkir úr Styrktarsjóði Greiningar- og ráðgjafarstöðvar ríkisins til minningar um Þorstein Helga Ásgeirsson. Styrktarsjóðurinn var stofnaður 8. júní 1995, en þann dag hefði Þorsteinn Helgi orðið 5 ára gamall. Í dag eru 25 ár frá fæðingardegi hans en hann lést 20. janúar 1995.

Frumkvöðlar að stofnun sjóðsins voru móðurbræður Þorsteins Helga, þeir Gunnar, Sveinn og Guðmundur Hanssynir, en foreldrar hans, Magnea Hansdóttir og Ásgeir Þorsteinsson, lögðu sjóðnum einnig til stofnfé. Sjóðurinn aflar fjár með sölu minningarkorta.

Markmið sjóðsins er að stuðla að aukinni þekkingu á fötlunum barna með því að styrkja fagfólk til framhaldsmenntunar og rannsóknarstarfa. Árlega eru veittir styrkir úr sjóðnum, oftast á fæðingardegi Þorsteins Helga, þann 8. júní.

Helgi Freyr Ásgeirsson bróðir Þorsteins Helga afhenti styrkina. Eftirtaldir hlutu styrk: Atli Magnússon, Brynja Jónsdóttir og Þóranna Halldórsdóttir til þátttöku í norrænni ráðstefnu um mötunarvanda. María Jónsdóttir til hönnunar og uppsetningar á kynfræðsluefni, Helga Þorleifsdóttir til rannsóknar á þátttöku einhverfra barna, Sigurlaug Vilbergsdóttir til diplómanáms við Endurmenntun HÍ og Marrit Meintema til þátttöku í alþjóðlegri ráðstefnu um hryggrauf.

 Í tilefni af 80 ára afmæli sínu afhenti Hans Guðmundur Hilaríusson afi Þorsteins Helga, sjóðnum sérstaka gjöf að upphæð 200.000 kr. sem afhent var fagsviði langtímaeftirfylgdar til að halda fjölskyldudag í Reykjadal fyrir börn með langvinnar fatlanir.

Starfsfólk Greiningar- og ráðgjafarstöðvar þakkar fjölskyldu Þorsteins Helga þann hlýhug og velvild sem þau sýna starfsemi og starfsfólki stofnunarinnar.