Alþjóðlegur dagur iðjuþjálfunar

Alþjóðlegur dagur iðjuþjálfunar

Í dag 27. október er alþjóðlegur dagur iðjuþjálfunar. Iðjuþjálfar nýta tækifærið til að kynna fag og störf á fjölbreyttum vettvangi. Iðjuþjálfafélag Íslands (IÞÍ) var stofnað 1976 og telur um 300 félagsmenn. Nám til BSc gráðu í iðjuþjálfunarfræði hófst við Háskólann á Akureyri 1997 og námsbrautin fagnar því 20 ára afmæli. Iðjuþjálfar starfa víða um land þar sem þeir veita börnum, unglingum, fullorðnum og öldruðum þjónustu. Þeir vinna hjá ríki, sveitarfélögum, á almennum vinnumarkaði auk þess að vera sjálfstætt starfandi sérfræðingar.

Þátttaka og lífsgæði
Iðjuþjálfar vinna með fólki sem vegna heilsuástands eða fötlunar getur ekki sinnt þeirri daglegu iðju sem það þarf og vill inna af hendi. Þetta eru athafnir sem skipta máli fyrir eigin umsjá, heimilisstörf, nám, atvinnu og tómstundaiðju. Iðjuþjálfi og skjólstæðingur vinna saman, setja markmið og finna leiðir til að hann eða hún megi efla færni sína og þátttöku í samfélaginu. Þannig er unnt að stuðla að auknu sjálfstæði og lífsgæðum viðkomandi. Vettvangurinn er fjölbreyttur innan heilbrigðis-, félags- og menntakerfis við heilsueflingu, forvarnir og endurhæfingu.

Iðjuþjálfar hafa sérþekkingu í að meta samspil einstaklings, iðju og umhverfis og finna hagkvæmar lausnir á hvers kyns iðjuvanda sem hefur neikvæð áhrif á heilsu barna og fullorðinna þar sem markmiðið er ávallt að efla færni, sjálfstæði, þátttöku og lífsgæði.

Þema dagsins í ár er „Inform Inspire Influence“ sem mætti snara á íslensku: Að upplýsa, hvetja og hafa áhrif.

Við á Greiningar- og ráðgjafarstöð óskum iðjuþjálfum innilega til hamingju með daginn! Smellið hér til að skoða heimasíðu IÞÍ.