Undirbúningur vorráðstefnu Ráðgjafar- og greiningarstöðvar í fullum gangi!

Undirbúningur vorráðstefnu Ráðgjafar- og greiningarstöðvar, sem haldin verður 11. og 12. maí nk. á Hilton Reykjavík Nordica hótelinu,  er nú í fullum gangi. Yfirskrift ráðstefnunnar að þessu sinni er Fagmennska og framsækni í þjónustu við börn með fatlanir. 

Dr. Sigurður Kristinsson prófessor við Háskólann á Akureyri mun fjalla um fagmennsku í víðu samhengi, hvað felst í hugtakinu og hvaða skyldur það leggur á herðar fagfólks. Dr. Sigrún Harðardóttir dósent og dr. Sigrún Júlíusdóttir munu fjalla um sjálfsrækt og mikilvægi handleiðslu fyrir fagfólk til að þroskast í starfi.

Sagt verður frá hvernig Akranesbær útfærir þjónustu við börn í anda Farsældarlaganna og Ragnheiður Hergeirsdóttir lektor kynnir Farsæld barna sem er ný námsleið við HÍ. Guðný Stefánsdóttir sviðsstjóri á RGR kynnir SIS matið og hvernig það nýtist í daglegu starfi með börnum og sagt verður frá verkefni í grunnskólum í Kópavogi sem kallast „Þegar réttindi og velferð grunnskólabarna stangast á“.

Sagt verður frá hvernig uppáhaldsorðin Færni – Fjölskylda – Form – Fjör – Vinir – Framtíð eru fléttuð inn starfið á Æfingastöðinni, ungar konur með CP kynna jafningjafræðslu á vegum CP félagsins, fimleikamaður sem stefnir á Special Olympics segir frá sinni reynslu og faðir barns með CP segir frá verkefninu „Skólinn í stólinn“. Inga Björk Margrétar Bjarnardóttir doktorsnemi mun fjalla um áskoranir sem fatlaðir standa frammi fyrir í rafræna heiminum og Haraldur Bjarnason frá Auðkenni mun kynna rafrænar lausnir sem eiga að nýtast öllum.

Óttarr Proppé verkefnastjóri í Mennta- og barnamálaráðuneytinu mun kynna stefnumótun í málefnum fatlaðra barna af erlendum uppruna og einnig verður sagt frá Alþjóðateymi velferðarsviðs Reykjavíkurborgar og hvernig það tryggir réttindi flóttafólks m.a. skólagöngu barna.

Dagskrá ráðstefnunnar verður ekki skipt upp í tvær málstofur eins og stundum áður en hún verður engu að síður mjög fjölbreytt. Margt fleira verður á dagskránni og vonumst við til að sem flestir geti notið hennar með okkur í vor. Sem fyrr verður boðið upp á streymi fyrir þátttakendur sem ekki eiga heimangengt. Opnað verður fyrir skráningu á ráðstefnuna síðar í vikunni.