Fáðu rafræn fréttabréf send á netfangið þitt
Flýtilyklar
Vorráðstefna RGR 2023: Fagmennska og framsækni í þjónustu við börn með fatlanir
Vorráðstefna Ráðgjafar- og greiningarstöðvar, verður haldin 11. og 12. maí nk. á Hilton Reykjavík Nordica hótelinu og í streymi. Ráðstefnan byggir á áratugalangri hefð Greiningar- og ráðgjafarstöðvar ríkisins (GRR) og mun standa í einn og hálfan dag en henni lýkur á hádegi föstudaginn 12. maí. Yfirskrift ráðstefnunnar að þessu sinni er Fagmennska og framsækni í þjónustu við börn með fatlanir
Dagskrána í heild má sjá hér.
Dr. Sigurður Kristinsson prófessor við Háskólann á Akureyri mun fjalla um fagmennsku í víðu samhengi, hvað felst í hugtakinu og hvaða skyldur það leggur á herðar fagfólks. Dr. Sigrún Harðardóttir dósent og dr. Sigrún Júlíusdóttir munu fjalla um sjálfsrækt og mikilvægi handleiðslu fyrir fagfólk til að þroskast í starfi.
Sagt verður frá hvernig Akranesbær útfærir þjónustu við börn í anda Farsældarlaganna og Ragnheiður Hergeirsdóttir lektor kynnir Farsæld barna sem er ný námsleið við HÍ. Guðný Stefánsdóttir sviðsstjóri á RGR kynnir SIS matið og hvernig það nýtist í daglegu starfi með börnum og sagt verður frá verkefni í grunnskólum í Kópavogi sem kallast „Þegar réttindi og velferð grunnskólabarna stangast á“.
Sagt verður frá hvernig uppáhaldsorðin Færni – Fjölskylda – Form – Fjör – Vinir – Framtíð eru fléttuð inn starfið á Æfingastöðinni og ungar konur með CP kynna jafningjafræðslu á vegum CP félagsins. Inga Björk Margrétar Bjarnardóttir doktorsnemi mun fjalla um áskoranir sem fatlaðir standa frammi fyrir í rafræna heiminum og Haraldur Bjarnason frá Auðkenni mun kynna rafrænar lausnir sem eiga að nýtast öllum.
Óttarr Proppé verkefnastjóri í Mennta- og barnamálaráðuneytinu mun kynna stefnumótun í málefnum fatlaðra barna af erlendum uppruna og einnig verður sagt frá Alþjóðateymi velferðarsviðs Reykjavíkurborgar og hvernig það tryggir réttindi flóttafólks m.a. skólagöngu barna.
Dagskrá ráðstefnunnar verður ekki skipt upp í tvær málstofur eins og stundum áður en hún verður engu að síður mjög fjölbreytt. Margt fleira verður á dagskránni og vonumst við til að sem flestir geti notið hennar með okkur í vor. Sem fyrr verður boðið upp á streymi fyrir þátttakendur sem ekki eiga heimangengt.
Námskeiðsgjöld og greiðsluskilmálar
Hægt er að ganga frá greiðslu með debet- og kreditkorti við skráningu. Ráðgjafar- og greiningarstöð áskilur sér rétt til þess að innheimta skráningar- og umsýslugjald ef tilkynning um forföll berst eftir að skráningartímabili lýkur.
Vinsamlega hafðu samband við Ráðgjafar- og greiningarstöð í netfangið fraedsla@rgr.is ef þú lendir í vandræðum með skráninguna.
