Á Greiningar- og ráðgjafarstöð ríkisins fer fram athugun á þroska og færni barna og unglinga með fatlanir og önnur frávik í þroska og veitt ráðgjöf í því markmiði að draga úr afleiðingum þroskaraskana eins og kostur er.
Þar fer einnig fram fræðsla til fjölskyldna þeirra og fagaðila um fatlanir barna og helstu meðferðarleiðir, svo og rannsóknir á ýmsu er varðar fatlanir barna.
Starfsemin einkennist af teymisvinnu og er leitast við að koma til móts við þarfir fjölskyldunnar eftir fremsta megni. Greiningar- og ráðgjafarstöð ríkisins þjónar börnum og unglingum með fötlun hvar sem þau búa á landinu.
Gildi Greiningar- og ráðgjafarstöðvar ríkisins
Fagmennska
Við sýnum trúverðugleika, fagmennsku, færni og ábyrgð í störfum okkar og leitumst við að veita börnum og fjölskyldum þeirra bestu mögulegu þjónustu.
Virðing
Traust og heilindi einkenna samskipti okkar innbyrðis og við hagsmunaaðila.
Framsækni
Við leitumst við að vera leiðandi afl í rannsóknum og miðlun þekkingar.
Velferð
Umhyggja og næmni einkenna öll samskipti okkar.
Framtíðarsýn
Á Greiningarstöð verði veitt þjónusta byggð á bestu þekkingu sem til er á hverjum tíma með því að tengja þjónustuna við rannsóknir og miðla henni með fræðslu.
