Jákvæðar leiðir til bættrar hegðunar

Hverjum ætlað?

Námskeiðið er ætlað þeim sem vinna með börnum og ungmennum með þroskafrávik og fatlanir, aðstandendum fatlaðra barna og öllum sem áhuga hafa.

Innihald

Námskeiðið byggir á gömlum grunni, þar sem það er unnið út frá námskeiðinu “Meðferð hegðunarerfiðleika” sem haldið hefur verið á vegum GRR mörg undanfarin ár. Í þessu námskeiði hefur verið tekið það sem reyndist vel og bætt við öðru sem nýtist betur á vettvangi í vinnu með og umönnun barna með þroskafrávik og fatlanir. Á námskeiðinu verður lögð áhersla á það að auka skilning þátttakenda á hegðunarvanda og skýringum á hegðunarvanda. Fjallað verður um hvernig standa skuli að mati á erfiðri hegðun með aðferðum hagnýtrar atferlisgreiningar og hvernig mat leiðir til einstaklingsmiðaðra inngripa. Talað verður um hvernig beita má jákvæðri styrkingu á kerfisbundinn og árangursríkan hátt og hvernig styrking er notuð til þess að auka æskilega hegðun í stað óæskilegrar hegðunar. Lögð verður áhersla á að framsetning og efnistök leiði til færni þátttakenda sem nýtist í vinnu þeirra og/eða umönnun barna með þroskafrávik og fötlun. Með auknum skilningi skapast leiðir til að vinna að jákvæðum leiðum til að fyrirbyggja hegðunarvanda. Fyrirlestrar verða í bland við verkefnavinnu í hópum og umræður, undir stjórn fyrirlesara

Markmið

• Að auka skilning þátttakenda á hvað kemur hegðunarvanda af stað og hvað viðheldur hegðunarvanda
• Að auka færni þátttakenda til að vinna að fyrirbyggjandi aðgerðum til að draga úr líkum á hegðunarvanda
• Að kynna fyrir þátttakendum hvernig skilningur á hegðunarvanda leiði til þess að beita megi jákvæðum aðferðum til að bæta hegðun.

Umsjón:

Sigríður Lóa Jónsdóttir, sálfræðingur
Atli F. Magnússon, atferlisfræðingur