Tákn með tali

Hvað er tákn með tali?

Tákn með tali (TMT) er tjáskiptaaðferð, sem er ætluð heyrandi fólki, bæði börnum og fullorðnum, sem eiga við mál- og talörðugleika að stríða. Tákn með tali hefur einnig nýst börnum með erlent móðurmál vel, sem eru að aðlagast nýju málumhverfi. Jafnframt hefur tákn með tali verið notað í auknum mæli til almennrar málörvunar fyrir ung börn bæði hér á landi og erlendis.

Tákn með tali byggist á því að tákn, látbragð, svipbrigði og bendingar eru notuð á ákveðinn hátt samhliða tali. Tilgangurinn er m.a. að gera málumhverfið skýrara og auðvelda tjáningu. Bætt tjáning hefur jákvæð áhrif á hegðun og líðan og stuðlar að sterkari sjálfsmynd. Misjafnt er hvenær byrjað er að kenna tákn með tali en í mörgum tilvikum er það notað með börnum allt frá fæðingu.

Hverjum er námskeiðið ætlað?

Námskeiðið er ætlað þeim sem áhuga hafa á að kynna sér tákn með tali tjáskiptaaðferðina og fjölbreytta notkun hennar. Sérstaklega á það við um starfsfólk leikskóla, grunnskóla og annara stofnana þar sem þörf er á skýru málumhverfi. Ástæður geta t.d. verið seinkaður málþroski, fötlun eða fjölmenningarlegt málumhverfi

Viðfangsefni

Fjallað verður um hugmyndafræði tákna með tali. Kennd verða tákn sem nýtast í daglegu starfi með TMT-notendum á öllum aldri. Kynntar verð hugmyndir og leiðir til að örva tjáskipti með táknum með tali. Gerðar verða æfingar og verkefni.

Vinnulag

Námskeiðið byggist á fyrirlestrum, kennslu tákna, æfingum og verkefnum. Áhersla er á virkni þátttakenda á námskeiðinu og að þeir deili með sér hugmyndum og verkefnum.　

Markmið

Að loknu námskeiði eiga þátttakendur að:

• - þekkja hugmyndafræðina sem liggur að baki TMT
• - hafa umtalsverðan táknafjölda á valdi sínu
• - geta notað TMT í starfi
• - geta verið sjálfstæðir í vinnubrögðum með TMT

Umsjón

Sigrún Grendal Magnúsdóttir talmeinafræðingur