Um fagsvið hreyfi- og skynhamlana
Hverjir koma?
Fagsvið hreyfi- og skynhamlana sérhæfir sig í þjónustu við börn sem eru hreyfihömluð, blind, alvarlega sjónskert, heyrnarlaus eða heyrnarskert. Flestir skjólstæðingar sviðsins eru hreyfihamlaðir vegna heilalömunar (cerebral palsy). Sem dæmi um aðrar hreyfihamlanir má nefna vöðvarýrnanir, hryggrauf (klofinn hrygg) og fleiri sjaldgæfa tauga- og vöðvasjúkdóma. Sjónskertum og heyrnarskertum börnum er vísað á sviðið hafi grunur vaknað um viðbótarfatlanir. Á sviðinu starfa barnalæknar, félagsráðgjafi, iðjuþjálfar, ritari, sálfræðingar sjúkraþjálfarar, talmeinafræðingur og þroskaþjálfi.
Hvað er gert?
Starfsemi sviðsins skiptist í greiningu, þjálfun, val og prófun hjálpartækja og óhefðbundinna tjáskiptaleiða, vettvangsathuganir á heimili og í skóla, ráðgjöf, rannsóknir og fræðslu. Þjónustan er sniðin að þörfum barns og fjölskyldu og tekur m.a. mið af aldri barnsins, fötlunargreiningu og búsetu. Yfirleitt lýkur reglubundinni eftirfylgd við 6 ára aldur eða þegar barnið byrjar í grunnskóla. Stefnt er að því að fylgja börnum með alvarlega fötlun t.d. fjölfötlun, hryggrauf eða framsækna tauga- eða vöðvasjúkdóma eftir til 18 ára aldurs oft í formi móttaka einu sinni til tvisvar á ári. Í öllu starfi sviðsins er haft náið samráð við fagfólk utan stöðvarinnar, s.s. lækna, þjálfara, ráðgjafa um málefni fatlaðra og kennara.
Fræðsla og rannsóknir
Reglulega eru haldin námskeið um hreyfihamlanir auk námskeiða um mismunandi leiðir í tjáskiptum. Birtar hafa verið rannsóknir byggðar á gagnagrunni Greiningarstöðvar um tíðni og birtingarform CP fötlunar meðal íslenskra forskólabarna, sjá Rannsóknir, Birtar rannsóknir. Á sviðinu er þroski og færni barna með CP skráð á kerfisbundinn hátt og frá árinu 2008 hefur Greiningarstöðin átt fulltrúa í verkefni sem fjármagnað er af Evrópusambandinu og kallast Surveillance of CP in Europe. Verkefnið hefur verið í gangi frá árinu 1998 og taka nú þátt í því nítján CP miðstöðvar í fimmtán Evrópu-löndum. Hlutverk þessa verkefnis er m.a. að samræma skráningu á færni og þroska barna með CP innan Evrópu og fylgjast með breytingum á tíðni og eðli fötlunarinnar. Markmiðið er að upplýsa yfirvöld og þá sem skipuleggja úrræði fyrir þennan hóp, um samsetningu hans, stærð og þarfir.
