Móttökur

Á Hreyfi- og skynhömlunarsviði er boðið upp á móttökur (einu sinni til tvisvar á ári) fyrir sérstaka hópa.

Þessir hópar eru: börn með hryggrauf, börn með alvarlegt form af CP sem búa úti á landi, börn með alvarlega framsækna vöðva- og taugasjúkdóma og börn með alvarlegar fátíðar fatlanir. Metið er í hverju tilfelli fyrir sig hvort barnið kemur einu sinni eða tvisvar á ári. Þá hittir barnið, foreldrar þess og þjálfarar, í einni heimsókn nokkra sérfræðinga sviðsins auk bæklunarlæknis og stoðtækjafræðings.  

Megin markmið með móttökum er að fylgjast með framgangi sjúkdóms eða fötlunar og bregðast við breyttri færni í tíma. Fylgst er með líðan barns og fjölskyldu þess, framgangi náms og félagslegri stöðu barnsins. Einnig eru veittar upplýsingar um félagsleg réttindi og þá þjónustu sem í boði er. Lagt er mat á þörf fyrir hjálpartæki og aðlögun þeirra. Ákveðið er hvort þörf sé fyrir læknisfræðilegar rannsóknir og sendar tilvísanir þegar við á (t.d. öndunarmælingar, röntgenrannsóknir og fl.).Veitt er fræðsla og ráðgjöf til foreldra, kennara, þjónustuaðila og annarra sem tengjast barninu og fjölskyldunni. Á milli móttaka er boðið upp á eftirfylgd í heimabyggð ef ástæða er til, t.d. við upphaf skólaárs. Þessi eftirfylgd er unnin í samráði við foreldra og fagfólk sem tengjast barninu.